動植物公園
帶着狗狗去遠行
2009年09月10日

金融海嘯一周年，正當人人唱好經濟已經回穩復甦，香港愛護動物協會近數月收到電話查詢放棄飼養寵物的情況，卻有上升趨勢。綜合藉口有四點：不能再負
擔飼養寵物的開支；大屋搬細屋；低估照顧責任；因調職外地而放棄寵物，尤其後者佔最多。「如屬短暫性，其實可嘗試請親友代為幫忙照顧寵物。就算移民咁大件
事，只要申請妥當，主人都可以帶埋寵物同行，總之一定有方法解決。」公關及傳訊部主任楊智韻敬請各位三思。所以我是真心的打從心底裡欣賞 Oscar和
Olive兩夫婦，上年去加拿大旅行，都肯花心思落重本帶埋兩隻領養得來的愛犬「仔仔」和「豬豬」伴遊，「理由好簡單，因為唔想丟低佢哋囉。」
Olive眼神堅定地對着我說。咪話唔感動！

八千里路雲和月

「仔
仔」和「豬豬」平時跟主人在香港環島遊就試得多，大鄉里去年尾搭長途機出境旅行，兩隻傻豬都係第一次咋！「為咗佢哋，籌備咗差不多一年時間。」
Olive充當發言人，強調事前的
research工夫一定要做足。原因一：好多國家都有動物出入境限制，須要接受或多或少的隔離檢疫。如不欲貓狗坐冤枉監，就要
check清楚那些國家/地方的政府規定，若能通過所申請的許可證內附帶的全部規條，就可免受扣查檢疫。理由二：好多國家都同香港一樣，帶住隻狗响身邊，
酒店唔住得，商場唔入得，參觀博物館更加咪使旨意，部分公共交通工具亦不歡迎寵物使用。所以，最好四海之內皆有親朋，有地方可供投宿；持有國際車牌更佳，
唔使煩人又可自行租車帶狗四圍去；旅遊地點宜偏離鬧市集中郊外，例如上網選擇一些可供犬隻內進的山林公園遊山玩水野餐宿營。「我哋之所以揀加拿大，就係貪
佢只要依足法例程序嚟做，就可免狗狗被隔離四至六個月之苦，而且朋友多慳番唔少住宿費。最最最緊要係時間啱啱好撞正滿山紅葉季節，楓景處處，
Oscar可以揸住架車四圍追楓，『仔仔』同『豬豬』通山跑玩得不知幾開心。」有相為證認真羨慕死人。

寵物外遊基本須知

用
一年時間籌備帶狗去旅行，唔係講笑絕對講真！事關重重批文申請覆核審批需時，最好每
part都預鬆時間。如遇上旅遊高峰期，部分大型航空公司更會取消動物託運存艙服務、或要額外收取附加費用，所以訂機票之前是必要問清楚。而航空公司的寵
物託運服務則間間收費不同，這點更加要問得仔細，如「仔仔」和「豬豬」，因為狗連飛機籠合共的重量，每隻均遠遠超出所選乘的加航指標「 A pet
and kennel with a combined weight of less than 70 lbs（
32.5kg）」，結果加加埋埋，兩隻狗的單程機票已經要 2萬幾！

1.根據漁農自然護理署寵物及禽鳥進出口指引，帶寵物離港前，須向目的地的檢疫當局查證入口規定，例如申請入口許可證、防疫注射、獸醫健康證明書、檢疫安排之類。
2.確定你的寵物已植入晶片，和已接受狂犬病防疫注射及相關的抗體血液測試報告等等。　　
3.領取貓狗特別許可證（簽證費貓狗每隻$432），詳情可上漁農自然護理署網址： http://www.afcd.gov.hk/

；電話： 2150 7063；或直接往長沙灣道 303號長沙灣政府合署 5樓漁農自然護理署進出口組索取表格。

一定有下次

也
許，大家會認為，花那麼長時間申辦/study/安排狗玩行程，但無得豪歎勁食
shopping喪蒲……機票來回使費仲要貴過人，為乜先？！「只要你真係當寵物係屋企人，你家庭一份子，你就唔會咁樣去斤斤計較！」
Olive說。永遠記得在加拿大的朋友家附近，就有維園咁大的綠油油草地，「豬豬」例必追住「仔仔」，好似放監一樣喪跑，玩摔角鬥相撲，呢種狗仔難尋自
由，香港冇
o架！帶「豬豬」和「仔仔」去尼亞加拉大瀑布，兩狗反成聯合國遊客們謀殺菲林對象，場面既威風又搞笑！和兩隻爛玩王一齊熬足幾百公里車程，去到山卡罅的阿
崗昆露營野餐賞楓，回歸大自然的牠們原來會通山追松鼠捉野兔、掘地窿收埋樹上掉下來的松果、 back to
nature用乾草遮住兜狗糧同水，「避免」其他猛獸發現行踪，叫身為「父母」的 Oscar和
Olive都唔知好嬲定好笑！還有在長石灘狂奔一幕，狼狗「仔仔」是會跑到雙眼發亮放光的！「我唔知其他人價值觀係點，於我而言，這十幾天的開心旅程，重
要過買名牌袋，更貴都值！」

Olive說荷包現正休養生息儲彈藥之中，希望趁牠們仲有氣有力，一家四口齊齊整整，再遊一次。