一直都好想影結婚相，唔係恨嫁，而係真係覺得D 相好靚! 
未結婚我就成日睇人地0既結婚相(係人地未求婚我就已經係咁)，又都因為成日睇， 所以到自己要影0既時候我都唔使揀，直接就同Sam爸講，我要去台中!
好多去台灣影相0既香港人都會揀台北，但係我睇咁多相，最鐘意始終都係台中MasaLili。www.masalili.com.tw
佢地D 相好接近大自然，唔會死咕咕得D 大頭相，仲有就係明碼實價，唔會逼你加錢買呢樣買0個樣。而且網上面已經一個個package列好晒，連行程同酒店俾海外新人， 煩少好多野!
研究左好耐，究竟响香港換錢好定去到台灣先呢? 結果係去百年搞掂~
上網做齊功課，出發!!
11月20號，坐香港快運12:05PM直飛台中。
一路等機，我一路同Sam爸講，响ESD Life個Forum度有對新人又係同我地搭同一班機去MasaLili。我地就一路係咁望，睇下有無人似係去影相0既…
因為係响二號客運大樓，所以人唔多，但係個個都唔係上年紀就係講國語，得兩對似有機會去影相0既。
由於香港快運D 機係要响停機坪上，所以搭車去0既時候，我地繼續研究，然後一人估一對，睇下邊個0岩?!
之前未搭過香港快運，但係有朋友話個飛機餐幾好，試下，又OK wor。不過個幾鐘頭飛機，D 空中小姐真係要好快手咁派餐同收餐囉!
到台中啦，個機場好細呀，一眼睇晒~ 過關仲好快添!
本來我地响網上面book左的士架，但係唔知係咪班機個時間改左，連個flight number都改埋，條友無出現囉…
我同Sam爸等左一陣，決定自己走，就係呢個時候，Sam爸估去影相0既一對行埋黎，問要唔要share 車出台中市，梗好架!
一問，佢地唔係去影相，所以唔同路，不過都係同一個方向~
台中機場有人幫你截車同打價，我地去兩個唔同地方，NT500!
因為兩件大行李，第一架車放唔落，要等多一架，不過D 車都幾大…
MasaLili幫我地Book 0既酒店係黎客商務酒店，大概30分鐘左右就到。
一到酒店，bell boy就撲出來幫我地拎行李，櫃台D 姐姐又好好笑容，勁好服務!
放低D 野，望下個房，樣樣都有，牙刷，浴帽，洗頭水，沐浴液，棉簽，風筒，network cable…. 就係唔見保險箱??
即刻打電話去服務台，唔使5分鐘就有人送過來~
擺好D 錢同護照，出街~
黎客同台中最出名0既逢甲夜市超近，出門口轉右再轉左就到。但係我地出去0既時候尚早，4點幾，一片寂靜，我地對望後覺得有D 上當feel…
Anyway, 去到大馬路，見到間拉麵鋪，都肚餓啦，食野先!
我個係北海道拉麵
Sam爸好似係甚麼特級豚骨拉麵
食完望下個鐘，離MasaLili個appointment 時間差唔多，路邊就有個的士站，NT175就去到MasaLili。
一入MasaLili門口就有人招呼，隨即帶我上樓揀衫。
幫我0既女仔叫小雲，好斯文，俾左D 相佢睇話佢知我相要邊類型0既衫，佢就同我
研究大概我應該要揀2件白紗，3件晚裝。
跟住我地就一齊開始响一大堆晚裝裡面揀，D 衫好多，放响個架度好難，結果Sam爸要幫我一件件撥開黎睇~
我係0個D 知道自己要咩0既人，咩顏色唔要，咩style 唔好，所以好快就拎左一大堆黎試，大概20件左右。小雲於是幫我分類，有D 差唔多款0既就淨係揀一件試。
試試下發現，同一班機個對人都0係度揀緊~
好快我就揀到得返5件，之後就tough D，唔知揀邊件好….. 同Sam爸商量左一輪，忍痛飛左2 件…….
跟出再上多一層揀白紗。呢轉仲簡單，因為我唔要同我條婚紗style，所以仲快手~
揀好後，小雲就帶我地去返地下，等個Sales Manager 同我地傾package detail。葉葉係個肥肥0既女仔，好好傾好好玩。本來個package 淨係包20 張相，我地預左要加，不過就加左10張先，有八折，其他可以揀相日再加。搞掂之後就要等我地個攝影師Tommy，因為要同佢溝通一下，睇下要點影。(我地係加錢NT3000指定要Tommy影，因為佢擅長影Sweet Sweet相)
7點幾，Tommy出現，果然同網上D 相一樣，超黑同瘦!
我俾左一大堆相佢睇，等佢知道我地想要0既感覺。我個package 係影花田0既，但係我見好多人都話如果順路，佢地唔會介意影唔係package 裡面0既野。咁我就同Tommy講我想影水，海水，湖水，溪水都得，皆因佢地影水好有風格。佢話佢會同經理講，因為唔想個個香港客都係咁，我就話，我都唔係香港客，我係美國客人!!
8點15分左右，我地就搞掂晒，走得。
MasaLili D人仲幫我地叫埋車添~ 葉葉送埋我地出門口，Tommy仲幫我地開車門!!!
嚇得我兩個受寵若驚………..
坐車去逢甲夜市，眼前景象同之前完全唔同!! 多人多車到呢……
我地殺入夜市，竟然又見到share 車0既couple，Ronnie 同Apple!
真係橋~
呢個大腸包小腸好味呀, 大腸係糯米, 小腸係台灣香腸
不過食完都飽啦, 糯米好"漏"
呢間雞扒大特價, $29一塊, 好多人排…
塊野仲大過我塊面!!! 仲好juicy~
燒烤蝦, 淨係試左胡椒味, 普遍啦
NT10一串燒烤, 最愛台灣香腸, 腐皮都好好味, 幫襯左兩晚!!
渴wor… 飲乜好?
對面好平冰沙, $19一杯, 又幫襯左兩晚~
周圍都有鹵味, 但係食唔落啦………………………
11點未夠就返酒店, 敷個mask 聽日影靚靚相!!!