08中港台 – 台中婚紗之旅day 3 & 4

經過之前一日辛苦0既影相日, 我地都淨係訓到9 點到, 因為要食個免費早餐, cheap哩?!

另外我地預左去浸溫泉, 離台中市30 分鐘車程.

台中市0既交通工具除左的士就係電單車, d 公車好耐先有部, 所以幾日都係坐的士, 價錢都唔貴.

晌酒店叫車去麒麟峰溫泉, 大概NT280左右.

去到溫泉, 有個人企晌門口, 我話要獨立房, 佢話要NT1800.

我問佢, 你地網上價明明係NT1500 兩個鐘

佢話介紹0既係新建築, NT1500係汽車旅館

事但啦~ 間房又幾靚wor

仲有個小花園, 出面有個小河流, 聽下水聲, relax 下唔錯~

但係我地懷疑中左招, 房d 水未必係溫泉…………..

夠鐘就閃, 返酒店拎$, 拿拿臨赶去MasaLili

網上經驗, 食飽先去揀相, 因為個個都5, 6個鐘先掂

我同Sam爸成日笑, 使唔使咁耐, 仲約定點可以快d 揀相, 快d 可以去其他地方行

MasaLili 隔離有間Mos Burger, 兩條友閃電用左15 分鐘食飽~

去返化妝間0個邊揀相, 空了了, 得另一台人揀緊相

葉葉個助手Angela 教識我地點用佢地個揀相系統就留低我地自己搞, 所以係一d 壓力都冇~ 

我地個揀相方法係, 第一次齋睇所有相先, 唔好揀

Tommy影左191張相!!!!!!!!!!!!!!

第二次睇, 剔走一定唔要, 仲有165張?!?!

第三次睇, 寫低麻麻鍾意…

第四次… 第五次… 第六次…

唔記得睇左幾多次啦………………………

因為買相放CD 同放相簿價錢唔同，所以兩條友要度住D 錢黎買，唔係就俾晒$ 買相，連返酒店0既$ 都無，仲有去機場0既的士錢呢??

最後，我地係用左4 個鐘揀相，Angela話海外客人黎講，我地算好快…

我地upgrade左本相簿，NT3000，放30張相。

寫低晒有D 乜野佢地要執，12月8號會有第一校，但係放CD 0既相就唔會睇到，無得校對。

我地用現金找數，俾錢0個陣真係手都震埋，唉~

不過終於都搞掂啦!

我想行書店，問MasaLili D staff 邊度可以行，佢地介紹中友百貨裡面間誠品，又幫我地叫埋車。拜拜~

去到中友，又去搵野食先!

個food court 都好多野食，行過呢間，俾佢個價錢吸引住。因為未想食太飽，唔係無得去逢甲夜市掃街!

呢個餐 NT158，一個小火鍋加一個鐵板燒，再加無限添加飲品，仲要好好味，死未?!

中友D 路線都好日系，Sam媽無錢Shopping，所以都費事行，淨係响誠品買左兩本狗書。

出門口坐的士，有個穿著整齊0既哥哥一支箭標埋黎幫我開車門，跟住仲用手擋住車頂，"小心頭"… 俾左張類似發票0既東東我地，叫做乘車叮嚀卡，有埋的士個車牌，有D 咩事可以投訴咁wor。之後幫我地關門之餘，仲90度角鞠躬，嚇死我同Sam爸。

最後一晚响逢甲，殺呀!!!

11月23號，坐下午2點幾機，早上本來話會再出去行下，但係經過呢幾日，已經散晒，結果就响酒店hea 到12點check out。

酒店幫手叫車去機場，上車後，又有人生第一次野發生…

個司機竟然係唔識路去機場!!!!!!

你唔識路做的士司機?!

佢一路打電話問路，我地就一路驚，佢行D 路線同我地黎0個陣唔係咁架…..

好彩都平安到埠，幾驚miss 班機呀!

(機場係有門牌0既~)

落車俾$, 個表NT345，平左wor，俾NT400佢等佢找啦，佢一句多謝就收晒。我地又定左格，唉，算啦，我地都預左係咁多錢，由佢啦…..

一轉頭，又見到Ronnie 同Apple，喂~~~~~~~~~

check 好in，又去搵野食，個機場對面有D 店，黎左幾日都未食過紅燒牛肉麵，Sam爸話佢要食。

仲有時間，去FamilyMart行個圈，買樽四物試下先，好難飲…..

上機啦，唔捨得呢個地方~

出境同入境都係同一個位置，有個港客見條隊長，走去同個姐姐講，我係香港人，可唔可以開多條line响簽證0個度俾佢地過。

你傻架??

飛機駛出0既時候，我見到地勤D 人同飛機揮手拜拜囉，果然深受日本文化陶燻~ But I like it!!

飛機餐食東坡肉，呢個trip真係肥幾磅!!

女人點會唔shopping呀，收穫唔大，飾品多~
total 唔使NT500

好啦，4日終於寫晒…

我D 校對相都係呢兩日先收到，你地嘈都無用架